Azərbaycan Türkiyə ilə Qarabağ və Şərqi Zəngəzur iqtisadi rayonlarında tikinti işlərinə dair sənədlər imzalayıb.
Türkiyənin tikinti şirkətlərinə bu məqsədlər üçün 3,4 milyard dollar ayrılacaq.
Bunu ümummilli lider Heydər Əliyevin və Türkiyə Cümhuriyyətinin 100 illiyinə həsr edilmiş Azərbaycan-Türkiyə İnvestisiya Forumunda çıxışı zamanı Azərbaycan Respublikası İqtisadiyyat Nazirliyinin rəhbəri Mikayıl Cabbarov açıqlayıb.
“Sevindirici fakt odur ki, Türkiyə şirkətləri işğaldan azad edilmiş ərazilərdə bu layihələrdə fəal iştirak edir. Azərbaycan Türkiyə şirkətləri ilə Qarabağda bərpa və yenidəqurma işləri üçün 3,4 milyard dollarlıq müqavilə imzalayıb” ,- deyə nazir vurğulayıb.
Nazir qeyd edib ki, 2021-ci ildən 2023-cü ilə qədər işğaldan azad edilmiş ərazilərin dirçəldilməsi üçün 7 milyard dollar vəsait ayrılıb.
O, həmçinin bildirib ki, respublikada investisiya layihələrinin inkişafı üçün rahat şərait yaradılır.
O cümlədən, Azərbaycandan olan investisiya şirkəti hazırda Türkiyə müəssisələri ilə Qarabağ və Şərqi Zəngəzur iqtisadi rayonlarında su elektrik stansiyalarının bərpası ilə bağlı danışıqlar aparır.
Qeyd edək ki, ötən gün – dekabrın 21-də Bakıda Azərbaycan Respublikası İqtisadiyyat Nazirliyi, Türkiyə Respublikası Ticarət Nazirliyi, Türkiyə Respublikası Prezidentinin Maliyyə ofisinin dəstəyi, İxracın və İnvestisiyaların Təşviqi Agentliyi – AZPROMO və Türkiyə-Azərbaycan İş Adamları və Sənayeçiləri İctimai Birliyinin (TÜİB) birgə təşkilatçılığı ilə Azərbaycan-Türkiyə İnvestisiya Forumu keçirilib.
Azərbaycan Respublikasının iqtisadiyyat naziri Mikayıl Cabbarov, Türkiyə Prezidentinin Maliyyə İdarəsinin müdiri Göksel Aşan və Türkiyə Respublikasının ticarət naziri Ömər Bolat forumda çıxış ediblər.
Xatırladaq ki, 2022-ci ildə Azərbaycanla türk dövlətləri arasında ticarət dövriyyəsi əvvəlki illə müqayisədə 70.0 faiz artaraq 5 milyard 23 milyon dollardan 7 milyard 170 milyon dollaradək yüksəlib. Ötən il Azərbaycanın bütün türk dövlətləri ilə ticarət dövriyyəsində artım qeydə alınıb
Qardaş Türkiyə ilə dövriyyəmiz 2022-ci ildə 6.0 milyard dollara yaxınlaşıb. 2021-ci ildə 4 milyard 661 milyon dollar olan ticarət dövriyyəsi isə 2022-ci ildə 5 milyard 842 milyon dollaradək yüksəlib.
Türkiyə Azərbaycanın 2-ci əsas ticarət tərəfdaşıdır. 2023-cü ilin 11 ayında Türkiyə ilə ticarət dövriyyəmiz təxminən 7,2 milyard ABŞ dolları təşkil edib.
Yasəmən MƏMMƏDLİ